Kalibotanong Bakak

Way nangutana niya. Way nagpaabot nga mao toy iyang isulti. Way niawhag niya paghatag sa kasayuran. Di matapos ang kalibotan kon di to niya luwatan. Apan si Pres. Arroyo wa magpapiri. Ni magpapugong. Ang iyang pamahayag way bisan gamay na lang panagana.
Ambot kon naapil ba sa script. O iya na lang gidalidali pag-apas ginamit ang laptop nga way guba-guba bisan kapila na niya gibalibag. O iya na lang gipuno kay nikalit lang pagsantop sa iyang hunahuna samtang nagdiskurso na.
Iyang pahibawo: Ang World Bank (WB) dunay giandam nga $10 bilyones alang sa Pilipinas ug ubang mga nasud sa habagatan silangang Asya kon maapiki sa kalibotanong krisis sa panalapi.
-o0o-
Ang iyang sulti wa sugata og sipang pakpak. Ang iyang pamahayag wa hatagi og igong gibug-aton. Kay ang iyang kasayuran di makapakugang. Kasarangan lang nga atubangan sa kalibotanong paningkamot pagluwas sa mga bangko ug ubang mga institusyon sa panalapi nga nangapurdoy, mangandam sab ang WB pag-agak sa iyang sakop nga mga nasud.
Laing hinungdan nga way nakugang sa pahibawo ni Arroyo: Human sa $700 bilyones nga gigahin sa Estados Unidos, wa ra sa kumingking ang $10 bilyones. Ug kon napakyas ang $700 bilyones pagpakalma sa mga magpapatigayon sa nagkalainlaing kanasuran, unsa man intawoy mahimo sa $10 bilyones nga gihisgutan ni Arroyo?
-o0o-
Maong di tiaw ang kakugang sa katawhang Pilipinhon dihang ang pamahayag ni Arroyo gipanghimakak sa WB. Nahasol gyod tingaling WB kay gawas nga paspas kaayo gisangyaw gyod sa tibuok kalibotan ang ilang panghimakak. Mahimo ra man untang hatagan lag higayon ang Malakanyang pagbakwi sa pahibawo sa paagi nga di manlipaghong sa kauwaw si Arroyo.
Ang panagang sa palasyo, sama sa naandan, wa magkadimao. Ang unang lusot ni Trade Secretary Peter Favila mao nga niuyon nang WB sa $10 bilyones nga gisugyot ni Arroyo. Apan nausab ang hunahuna sa kadagkoan sa WB. Sa wa pang kaluwat ang WB og laing panghimakak, giangkon ni Neda Director General Ralph Recto nga sayop si Arroyo—ang $10 bilyones gikan diay sa IMF.
-o0o-
Di ni unang higayon nga naangin ang ubang kanasuran sa sayop nga pamahayag ni Arroyo. Dihang nipadayag siyag kaalarma sa kanihit sa suplay sa bugas sa Pilipinas, nanakod dayon ang iyang kahadlok sa ubang kanasuran—ang importers nisunod sa Pilipinas pagpangomprag mas daghan, samtang ang exporters sama sa Vietnam ug Thailand nihigpit sa ilang pagpamaligya. Ang sangpotanan: Niulbo ang kalibotanong krisis sa pagkaon.
Naanad na ba lang gyod si Arroyo sa pagpangulipas? Nga wa na siyay bisan gamay na lang kaikog nga masakpan? Nga wa na lang magsapayan unsay sangpotanan sa sayop niyang kasayuran? Nihuot na ba pag-ayo sa Pilipinas ang iyang kahigwaos pagsulti sa di tinuod? Nga kinahanglan na niyang iduhig ang tibuok kalibotan? [30] leo_lastimosa@abs-cbn.com