Padayon Ang Sabong

PADAYON ANG SABONG



Dihang ang pangu sa kasundalohan sa Thailand niawhag sa naapiki nilang primero ministro sa pagkanaog gikan sa katungdanan, di gamay sa mga Pilipinhon ang nakugang. Ug nasina. Di silang kapaabot sa pangu sa kasundalohan sa Pilipinas nga mangahas pag-awhag ni Pres. Arroyo sa paglayas sa Malakanyang.

Dihang niawhag si Fidel Ramos sa resignasyon ni Ferdinand Marcos niadtong 1986, di siya maoy pangu sa kasundalohan. Si Heneral Fabian Ver nagpaluyo ni Marcos hangtod sa ilang pagkapukan. Si Angelo Reyes maoy hepe sa AFP sa iyang pag-awhag ni Joseph Estrada pagkanaog sa Malakanyang. Apan di siya maoy tinuod nga yawe sa pagkatangtang ni Erap.

-o0o-

Di kapaabot ang mga Pilipinhon nga mobarug ang mga pangu sa atong kasundalohan alang sa katarung. Susiha lang ang mga eskandalo nga naglambigit sa mga heneral aron ka makumbinser nga wa silay kalainan sa kurakot nga mga politiko nga atong gipanghimaraot. Maong nagpalabwanay ang mga politiko nagpabaha ug mga heneral nga nagkabiba sa minilyon ka pesos nilang katigayonan.

Maong ang batan-ong mga opisyal sa kasundalohan maoy naa sa mas maayong posisyon pagpasiugda og kausaban. Kay naghupot pa sa ilang ideyalismo ug wa pa hingpit nga malubong sa kadudahang mga transaksiyon. Apan ang nangagi nilang mga pag-alsa gidudahang gipaluyohan sa mga politiko. Nga mas nangalisbo kay sa mga opisyal nga gusto nilang pulihan.

-o0o-

Ang kasundalohan gitahasan sa batakang balaod pagpanalipod sa katawhan. Bisan batok sa mga namunoan nga inay mopatigbabaw nibudhi na hinuon sa nasudnong interes. Nga di layo sa ilang kasingkasing. Kay kasagaran sa mga sundawo sama sa kinabag-an sa katawhan---kabos ug timawa.

Apan unsay nahitabo? Ang mga sundawo gigamit paglapas sa balaod---pagdupa sa panlaktod sa higanteng mga patigayon, pagyatak sa tawhanong katungod sa mga mag-uuma ug pagtuman sa ilegal nga sugo sa ilang kadagkoan.

Nganong nahitabo ni? Kay sama sa ubang hut-ong sa katilingban, wa sila makighiusa sa kinabag-an sa katawhan maong sayon kaayong napahimuslan.

-o0o-

Kon wa pa kang kabantay, ang alas sa mga nagpahimus sa nasud ug sa katawhan mao ang ilang paglampos pagbuwag ug pagbuakbuak nato. Ang labing nakapahuyang sa katawhan mao ang atong kapakyas pag-ila sa atong kadaghan ug kagamhanan.

Nga maoy nahitabo sa nangaging kapid-an na ka katuigan. Ang pait nga kahimtang nato karon mao sab ang nahiagoman sa atong katiguwangan. Gikan sa mga datu sa wa pa motakas ang mga langyaw nga way nhibaw-an lapas sa mga baybayon sa ilang giangkon nga mga isla. Ngadto sa mga langyaw nga nipalig-on ug mas nipalig-on pa sa kaburong. Ug sa atong kaugalingong mga kadugo nga nagpaburot pinaagi sa padayong pagsabong nato.

Pila na ka henerasyon tang nag-unay? Ato ba lang gihapon nga paundayonan? O panahon na nga hatagan og kinutoban? [30] leo_lastimosa@abs-cbn.com